"Xsolla–IDDA Game Incubation Program 2026" uğurla başa çatdı

İnnovasiya və Rəqəmsal İnkişaf Agentliyi (İRİA) ilə qlobal oyun sənayesi şirkəti Xsolla-nın birgə həyata keçirdiyi “Xsolla–IDDA Game Incubation Program 2026" uğurla yekunlaşıb. Proqramın final mərhələsi çərçivəsində keçirilən Demo Day tədbirində iştirakçı komandalar hazırladıqları oyun layihələrini beynəlxalq münsiflər heyətinə təqdim ediblər.

İnkubasiya proqramına ümumilikdə 15 oyun komandası qatılıb. Bir neçə ay davam edən mentorluq və inkişaf mərhələsindən sonra 10 komanda finala yüksələrək layihələrini oyun sənayesinin təcrübəli mütəxəssisləri qarşısında təqdim etmək imkanı əldə edib.

Münsiflər heyətinin qiymətləndirməsinə əsasən, aşağıdakı komandalar qalib elan olunub:

Avalorix Interactive – Fractunum

BloodBuzz Studio – BloodBuzz

VIA Studio – Domino Royale

Massive Dreamers Studio – Hotel California

Qalib komandalar 22–30 avqust 2026-cı il tarixlərində Almaniyanın Köln şəhərində keçiriləcək və dünyanın ən nüfuzlu oyun sənayesi tədbirlərindən biri hesab olunan Gamescom 2026 sərgisində iştirak etmək hüququ qazanıblar. Bu imkan onlara layihələrini beynəlxalq oyun şirkətlərinə, investorlara və nəşriyyatçılara təqdim etməyə, yeni əməkdaşlıqlar qurmağa şərait yaradacaq.

“Xsolla–IDDA Game Incubation Program 2026” çərçivəsində iştirakçılar mentorluq sessiyalarında iştirak edib, beynəlxalq ekspertlərdən rəy alıb və qlobal oyun bazarının tələbləri ilə yaxından tanış olublar. Proqramın əsas məqsədi yerli oyun studiyalarının inkişafını sürətləndirmək, onların beynəlxalq bazarlara çıxışını asanlaşdırmaq və Azərbaycanda oyun ekosisteminin güclənməsinə dəstək vermək olub.