SOCAR “WIN” Açıq İnnovasiya Proqramına müraciətlər başlayıb

SOCAR enerji sektorunda innovativ texnologiyaların tətbiqini sürətləndirmək məqsədilə “WIN” (What is Next) Açıq İnnovasiya Proqramını elan edib. Proqram çərçivəsində enerji və neft-qaz sənayesində mövcud prosesləri təkmilləşdirə biləcək yeni texnoloji həllərin real mühitdə sınaqdan keçirilməsi nəzərdə tutulur.

“WIN” proqramının əsas məqsədi neft-qaz əməliyyatlarının səmərəliliyini artıran, təhlükəsizliyi gücləndirən və enerji keçidinə töhfə verən innovativ həlləri müəyyənləşdirmək və onların SOCAR ekosistemində tətbiq imkanlarını yoxlamaqdır.

Proqram çərçivəsində süni intellekt, rəqəmsallaşma, məlumat analitikası, aşağı karbonlu texnologiyalar və əməyin mühafizəsi, sağlamlıq və təhlükəsizlik (HSE) istiqamətlərində hazırlanmış layihələrə üstünlük veriləcək.

Seçilmiş layihələr üçün 20 min ABŞ dollarınadək sınaq büdcəsi nəzərdə tutulur. İştirakçılar maliyyə dəstəyi ilə yanaşı, SOCAR-ın mütəxəssisləri ilə birgə işləmək və texnoloji həllərini real sənaye mühitində sınaqdan keçirmək imkanı əldə edəcəklər.

Proqrama dünyanın istənilən nöqtəsindən startaplar, texnologiya şirkətləri və fərdi innovatorlar müraciət edə bilər. İştirak üçün təqdim olunan həllərin enerji sektorunda real problemlərin həllinə və əməliyyatların təkmilləşdirilməsinə yönəlməsi gözlənilir.

Namizədlər 12 sentyabr 2026-cı il tarixinədək rəsmi müraciətlərini aşağıdakı platforma üzərindən göndərə bilərlər:

win.socar.az