Rəqəmsal səyyah statusu Miqrasiya Məcəlləsində təsbit edilir

Azərbaycanda rəqəmsal səyyah statusu rəsmi hüquqi çərçivəyə salınır. Prezidentin 22 oktyabr 2026-cı il tarixli fərmanları ilə Miqrasiya Məcəlləsinə edilən dəyişikliklər bu statusun məzmununu müəyyən edir.

Rəqəmsal səyyah dedikdə rəqəmsal texnologiyalar, süni intellekt, kibertəhlükəsizlik və innovasiya sahələrində uzaqdan işləyən, gəlirini yalnız xarici mənbələrdən əldə edən əcnəbilər və vətəndaşlığı olmayan şəxslər nəzərdə tutulur.

Bu kateqoriyaya aid şəxslər üçün ezamiyyət vizası, həmçinin müvəqqəti və daimi yaşayış icazəsi alma imkanı nəzərdə tutulub.

Yaşayış icazəsi almaq üçün iki əsas şərt müəyyən edilib: vergi uçotuna durmaq və texnologiyalar parkının rezidenti qismində fəaliyyət göstərmək. Eyni zamanda xarici mənbələrdən sabit gəlir əldə olunmasına dair tələblər də qoyulur.

Dəyişikliklərlə rəqəmsal səyyahlar və rəqəmsal sahələr üzrə yüksəkixtisaslı miqrantlar barədə icbari dövlət sosial sığortası müddəaları dəqiqləşdirilib.

Yüksəkixtisaslı miqrantlara ayrıca güzəşt tətbiq olunur: xaricdəki qeyri-rezident işəgötürənlərlə bağlanan əmək müqavilələri üzrə xarici mənbələrdən əldə edilən gəlir 20 il müddətinə gəlir vergisindən azad ediləcək.

Frilanserlər və rəqəmsal səyyahlar texnologiyalar parkının rezidenti ola biləcək. Fəaliyyət istiqamətləri arasında proqram təminatı və sistem inteqrasiyası, süni intellekt, kibertəhlükəsizlik, robototexnika, bulud texnologiyaları və oyun texnologiyaları göstərilib.

Rezidentlik üzrə qeydiyyat elektron qaydada, "mygov biznes" platforması vasitəsilə aparılacaq. Yeni qaydalar 2027-ci il yanvarın 1-dən qüvvəyə minir.