Kartdan-karta köçürmələrə yeni limitlər tətbiq edildi

Azərbaycanda kartdan-karta (card-to-card) pul köçürmələri ilə bağlı yeni qaydalar qüvvəyə minib. Avqustun 1-dən etibarən tətbiq olunan dəyişikliklər köçürmə əməliyyatlarının daha təhlükəsiz və şəffaf şəkildə həyata keçirilməsini hədəfləyir.

Yeni qaydalara əsasən, bir bank kartı vasitəsilə gün ərzində maksimum 5 köçürmə göndərmək və 5 köçürmə qəbul etmək mümkün olacaq. Bundan əlavə, kartdan-karta köçürmələrin aylıq ümumi limiti 20 000 manat olaraq müəyyən edilib.

Qeyd edək ki, müştərinin öz adına olan bank kartları arasında etdiyi köçürmələr bu məhdudiyyətlərə aid edilmir. Yəni eyni şəxsə məxsus kartlar arasında vəsait köçürmək əvvəlki qaydada davam edəcək.

Mərkəzi Bankın açıqlamasına görə, yeni limitlərin tətbiqində əsas məqsəd ödəniş sistemlərində təhlükəsizliyi və şəffaflığı artırmaq, maliyyə fırıldaqçılığı, vergidən yayınma halları və qanunsuz mərc əməliyyatları ilə mübarizəni gücləndirməkdir.

Yeni qaydalar gündəlik istifadəçilərin əksəriyyətinə ciddi təsir göstərməsə də, tez-tez və yüksək məbləğdə kartdan-karta köçürmələr həyata keçirən şəxslərin bu limitləri nəzərə alması tövsiyə olunur.