Daha 10 layihə “Startap” şəhadətnaməsinə layiq görüldü

“Startap” şəhadətnaməsinin verilməsi məqsədilə yaradılmış Ekspertlər Şurasının növbəti iclasında 16 layihəyə baxılıb. Qiymətləndirmənin nəticələrinə əsasən, Kiçik və Orta Biznesin İnkişafı Agentliyi (KOBİA) tərəfindən daha 10 KOB subyektinə “Startap” şəhadətnaməsi təqdim edilib.

Yeni şəhadətnamələr rəqəmsal ticarət, logistika, ictimai iaşə, sağlam həyat tərzi, süni intellekt və digər sahələr üzrə fəaliyyət göstərən layihələrə verilib. Şəhadətnamə alan layihələr arasında “Smartcart” MMC-nin özünəxidmət əsaslı alış-veriş və ödəniş platforması, “İ Happy” MMC-nin rəqəmsal hədiyyə kartları platforması, “Kataloq Shop” MMC-nin satış, inventar, CRM və logistikanı vahid sistemdə birləşdirən həlli, “Eintree Solutions” MMC-nin ictimai iaşə obyektləri üçün rəqəmsal platforması və “Dahacox” MMC-nin gül və hədiyyələr üzrə elektron ticarət platforması yer alır.

Həmçinin “FitNest” MMC-nin idman və sağlam həyat tərzi platforması, Bəhruz Quliyevin rəqəmsal logistika həlli, Ümid Rzazadənin restoranların sifariş və idarəetmə prosesləri üçün platforması, “Talantly” MMC-nin süni intellekt əsaslı istedad və karyera platforması, eləcə də “Modbender” MMC-nin geyim və aksesuarların rəqəmsal kombinləşdirilməsinə imkan verən xidməti də “Startap” şəhadətnaməsinə layiq görülüb.

“Startap” şəhadətnaməsi sahiblərinə şəhadətnaməni əldə etdikləri tarixdən etibarən 3 il müddətində innovasiya fəaliyyətindən əldə olunan gəlirlər üzrə mənfəət və gəlir vergisindən azadolma imkanı yaradır.

Yeni şəhadətnamələrin verilməsi ilə Azərbaycanda “Startap” şəhadətnaməsi almış KOB subyektlərinin ümumi sayı 302-yə çatıb.

Layihələri inkişaf mərhələsində olan mikro və kiçik sahibkarlıq subyektləri “Startap” şəhadətnaməsi almaq üçün KOBİA-ya müraciət edə bilərlər.