AzInTelecom rəqəmsal imza infrastrukturu WebTrust auditindən keçib

AZCON Holdinqin tərkibinə daxil olan “AzInTelecom” MMC-nin rəqəmsal imza infrastrukturu beynəlxalq “WebTrust for Certification Authorities” auditindən uğurla keçib. Müstəqil qiymətləndirmə şirkətin təhlükəsizlik və idarəetmə proseslərinin beynəlxalq standartlara uyğunluğunu təsdiqləyib.

“WebTrust for CA” sertifikat xidmətləri göstərən qurumlar üçün beynəlxalq səviyyədə tanınan audit standartıdır. Standart Amerika Sertifikatlı Mühasiblər İnstitutu (AICPA) və Kanada Peşəkar Mühasiblər təşkilatı (CPA Canada) tərəfindən hazırlanıb.

Audit çərçivəsində müstəqil auditorlar şirkətin informasiya təhlükəsizliyi idarəetmə sistemlərini, kriptoqrafik açarların idarə olunması qaydalarını və əməliyyat proseslərini qiymətləndirib.

Şirkətin İnformasiya Təhlükəsizliyi Departamentinin rəhbəri Ruslan Dadayevin sözlərinə görə, əsas hədəf dövlət və biznes proseslərinin rəqəmsallaşmasını dəstəkləyən infrastruktur qurmaqdır.

O qeyd edib ki, müstəqil auditin uğurla başa çatması AzInTelecom-un həm yerli, həm də beynəlxalq bazarlarda etibarlı texnoloji tərəfdaş mövqeyini gücləndirir və yeni əməkdaşlıqlar üçün zəmin yaradır.

Audit nəticəsi korporativ müştərilər, dövlət qurumları və fiziki şəxslər üçün rəqəmsal imza xidmətlərinin təhlükəsizliyi, məxfiliyi və etibarlılığı baxımından əlavə təminat deməkdir.

Rəqəmsal imza elektron sənəd dövriyyəsinin, onlayn dövlət xidmətlərinin və bank əməliyyatlarının hüquqi etibarlılığını təmin edən əsas alətlərdən biridir. Sertifikat mərkəzlərinin beynəlxalq standartlara uyğunluğu isə bu etibarlılığın təməlini təşkil edir.

Şirkətdən bildirilib ki, rəqəmsal xidmətlərin beynəlxalq standartlar səviyyəsində inkişafı təhlükəsiz elektron xidmətlərin yayılmasına, milli rəqəmsal ekosistemin böyüməsinə və Azərbaycanın regional rəqəmsal mərkəzə çevrilməsi hədəfinə xidmət edir.