Azərkosmos Beynəlxalq Kosmik Hüquq İnstitutu ilə memorandum imzaladı

Azərbaycan Kosmik Agentliyi (Azərkosmos) ilə Beynəlxalq Kosmik Hüquq İnstitutu (IISL) arasında anlaşma memorandumu imzalanıb. Sənəd oktyabrın 7-də Antalyada keçirilən 77-ci Beynəlxalq Astronavtika Konqresi çərçivəsində təsdiqlənib. Əməkdaşlıq barədə məlumatı Azərkosmos yayıb.

IISL müstəqil beynəlxalq təşkilatdır və BMT-nin Kosmik Fəzanın Dinc Məqsədlərlə İstifadəsi üzrə Komitəsində (COPUOS) daimi müşahidəçi statusuna malikdir. Təşkilat kosmik hüquq üzrə dünyanın ən nüfuzlu ekspert platformalarından biri sayılır və bu sahədə akademik tədqiqatların, hüquqi müzakirələrin əsas mərkəzlərindən biridir.

Memorandumun əsas məqsədi kosmik hüquq sahəsində beynəlxalq əməkdaşlığın genişləndirilməsi və kosmik fəzada hüququn aliliyinin möhkəmləndirilməsidir. Sənəd tərəflərin bu istiqamətdə uzunmüddətli birgə fəaliyyətinə çərçivə yaradır.

Razılaşmaya əsasən tərəflər kosmik hüquqa həsr olunmuş birgə tədbirlər təşkil edəcək. Həmçinin bu istiqamətin universitetlərin akademik proqramlarına integrasiyası və mövzu ətrafında maarifləndirmənin artırılması planlaşdırılır. Belə yanaşma gənc hüquqşünaslar arasında ixtisaslaşmanın formalaşmasına xidmət edir.

Əməkdaşlığın ayrıca istiqaməti informasiya mübadiləsidir. Tərəflər kosmik hüququn aktual məsələləri və inkişaf istiqamətləri üzrə məlumat və təcrübə paylaşacaq. Bu mexanizm beynəlxalq praktikadakı yeniliklərin operativ izlənilməsinə imkan verəcək.

IISL Azərbaycanın kosmik qanunvericiliyinin və tənzimləyici bazasının formalaşdırılması üçün ekspert məsləhətləri və tövsiyələr verəcək. Bu dəstək milli hüquqi çərçivənin beynəlxalq normalara uyğunlaşdırılmasına yönəlib.

Praktik işin aparılması üçün birgə ekspert işçi qrupları yaradılacaq. Qruplara Azərkosmosun hüquqşünasları və IISL-in müstəqil ekspertləri cəlb olunacaq. İşçi qrupların fəaliyyəti konkret hüquqi məsələlər üzrə təhlil və tövsiyələrin hazırlanmasını nəzərdə tutur.

Memorandum, bütövlükdə, ölkənin kosmik fəaliyyət üzrə hüquqi və institusional bazasının gücləndirilməsinə, beynəlxalq təcrübənin öyrənilməsinə və bu sahədə peşəkar potensialın artırılmasına hesablanıb. Peyk rabitəsi, Yer müşahidəsi və məlumat xidmətləri bazarının genişləndiyi şəraitdə hüquqi tənzimləmə məsələləri operatorlar üçün getdikcə daha kritik amilə çevrilir.