Azərbaycanda "Digital Nomad Visa" tətbiq oluna bilər

Azərbaycanda "Digital Nomad Visa" (rəqəmsal köçəri vizası) mexanizminin tətbiqi gündəmə gəlib. Milli Məclisdə çıxış edən Rizvan Nəbiyev bildirib ki, bu təşəbbüs ölkəyə xarici İT mütəxəssislərinin, innovativ sahibkarların və uzaqdan çalışan peşəkarların cəlb olunmasına töhfə verə bilər.

Deputatın sözlərinə görə, "Digital Nomad Visa" mexanizmi Azərbaycanın regionun aparıcı texnologiya və innovasiya mərkəzlərindən birinə çevrilməsi istiqamətində atılan addımlardan biri kimi qiymətləndirilir. Bu sistemin tətbiqi beynəlxalq mütəxəssislərin ölkədə yaşayıb işləməsini asanlaşdırmaqla yanaşı, yerli startap ekosisteminin inkişafına və xarici investisiyaların cəlbinə də müsbət təsir göstərə bilər.

Bununla yanaşı, ölkədə rəqəmsal iqtisadiyyatın inkişafını sürətləndirmək məqsədilə təxminən 30 qanun və məcəlləyə dəyişikliklərin hazırlanması istiqamətində iş aparıldığı qeyd olunub. Hazırlanan hüquqi islahatların innovasiya, rəqəmsal texnologiyalar və sahibkarlıq mühitinin daha da gücləndirilməsinə xidmət edəcəyi gözlənilir.

Çıxış zamanı elektron diplomların beynəlxalq səviyyədə tanınmasının genişləndirilməsi də əsas prioritetlərdən biri kimi vurğulanıb. Bundan əlavə, Avropa İttifaqı və ABŞ ilə texnologiya, innovasiya və rəqəmsal transformasiya sahəsində əməkdaşlığın genişləndirilməsi planlaşdırılır.

Qeyd edək ki, son illərdə dünyanın bir çox ölkəsi "Digital Nomad Visa" proqramlarını tətbiq edərək uzaqdan çalışan peşəkarları ölkələrinə cəlb etməyə çalışır. Belə vizalar adətən xarici vətəndaşlara müəyyən müddət ərzində ölkədə yaşamaq və xarici şirkətlər üçün məsafədən işləmək imkanı yaradır.