Azərbaycan startapları üçün beynəlxalq akselerasiya proqramına müraciət başlayıb

Azərbaycan startapları üçün beynəlxalq bazarlara çıxış imkanı yaradan yeni proqram elan edilib. ASAN AI Hub, “İnnovasiyalar Mərkəzi”, “INNOLAND” İnkubasiya və Akselerasiya Mərkəzi və Astana Hub əməkdaşlığı çərçivəsində yerli startaplar Central Eurasia Market Entry (CEME) beynəlxalq akselerasiya proqramına qoşula biləcəklər.

Proqram çərçivəsində Azərbaycandan seçiləcək 2 startap 12 həftə davam edəcək beynəlxalq akselerasiya proqramında iştirak etmək şansı qazanacaq. İştirakçılar Qazaxıstan bazarına çıxış, biznes əlaqələrinin genişləndirilməsi və beynəlxalq investorlarla görüşlər üçün müxtəlif imkanlardan yararlana biləcəklər.

Seçilən startaplara təqdim olunacaq imkanlar bunlardır:

• 12 həftəlik beynəlxalq akselerasiya proqramında iştirak

• Qazaxıstan bazarına çıxış və "soft landing" dəstəyi

• Almaty Hub-da 2 komanda üzvü üçün pulsuz iş məkanı və yaşayış

• B2B görüşlər, pilot layihələr və ekspert mentorluğu

• Beynəlxalq Demo Day tədbirində investorlara pitçinq etmək imkanı

• 10 000 ABŞ dollarınadək AWS Activate kreditləri

Proqram xüsusilə məhsulunu regional və beynəlxalq bazarlara çıxarmağı hədəfləyən innovativ startaplar üçün nəzərdə tutulub. Akselerasiya müddətində iştirakçılar həm mentor dəstəyi alacaq, həm də yeni tərəfdaşlıq və investisiya imkanları əldə edə biləcəklər.

Proqrama müraciət etmək istəyən startaplar üçün son müraciət tarixi 9 avqustdur. Müraciət üçün bura klikləyin.