Yeni “Twitter”də məlumatlara AI nəzarət edəcək

Twitter.now adlı yeni sosial şəbəkə istifadəyə verilib. Platformanı “Twitter”in keçmiş hüquq məsləhətçisi Stephen Coatesun da daxil olduğu Operation Bluebird startapı yaradıb.

Maraqlıdır ki, platforma istifadəyə verilməzdən əvvəl X şirkəti Operation Bluebird-i məhkəməyə verib. Şirkət “Twitter” adından istifadəyə etiraz edib. Startap isə X-in “Twitter” və “Tweet” ticarət nişanlarından imtina etdiyini bildirir.

Twitter.now-un əsas yeniliyi isə VERA adlı AI sistemidir. Sistem paylaşımlardakı iddiaları yoxlayacaq, mənbələri göstərəcək və məlumatlara etibar balı verəcək.

İstifadəçilər gələcəkdə müəyyən baldan aşağı olan paylaşımları lentlərində görməməyi də seçə biləcəklər.