WhatsApp istifadəçi adı funksiyasını istifadəyə verəcək!

WhatsApp istifadəçilərin məxfilik imkanlarını genişləndirən yeni funksiyasını təqdim etməyə başlayıb. Artıq platformada yazışmalar zamanı telefon nömrəsi əvəzinə istifadəçi adı (username) vasitəsilə əlaqə qurmaq mümkün olacaq.

Yeni sistem istifadəçilərə şəxsi mobil nömrələrini paylaşmadan digər şəxslərlə ünsiyyət yaratmağa imkan verəcək. Bu yenilik xüsusilə məxfilik və təhlükəsizlik baxımından istifadəçi təcrübəsini dəyişdirə biləcək funksiyalardan biri kimi qiymətləndirilir.

WhatsApp tərəfindən verilən məlumata görə, username funksiyası mərhələli şəkildə aktiv ediləcək və ilin sonuna qədər bütün istifadəçilərin istifadəsinə təqdim olunması planlaşdırılır.

Yeni funksiyanın əsas xüsusiyyətlərindən biri odur ki, istifadəçi adları ümumi axtarış nəticələrində görünməyəcək. Yalnız sizin dəqiq username məlumatınızı bilən şəxslər sizinlə əlaqə yarada biləcəklər. Bununla belə, hesab qeydiyyatı üçün telefon nömrəsi istifadəsi əvvəlki kimi məcburi olaraq qalacaq.

Şirkət həmçinin bildirir ki, istifadəçilər istənilən vaxt seçdikləri username-i dəyişə və ya bu funksiyanı deaktiv edə biləcəklər.