SOCGOV 2026: Xankəndidə rəqəmsal idarəetmə forumu başlayıb
Xankəndi şəhərində "SOCGOV 2026 – Ağıllı idarəetmə üçün rəqəmsal təhlil" adlı beynəlxalq forum işə başlayıb. Tədbir Əmək və Əhalinin Sosial Müdafiəsi Nazirliyinin tabeliyindəki DOST Agentliyinin təşkilatçılığı ilə keçirilir.
Forumda əmək və əhalinin sosial müdafiəsi naziri Anar Əliyev, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, həmçinin DOST Agentliyi İdarə Heyətinin sədri Fərid Məmmədov iştirak edir.
Tədbirin iştirakçıları arasında Türkiyənin əmək və sosial müdafiə naziri Vedat Işıkhan da var. Foruma müxtəlif ölkələrdən rəsmi şəxslər, beynəlxalq ekspertlər və texnologiya şirkətlərinin təmsilçiləri qatılıb.
Gündəliyin mərkəzində sosial idarəetmədə rəqəmsal transformasiya, süni intellekt əsaslı qərarvermə və vətəndaşyönümlü xidmət modelləri dayanır.
Proqram TEDx formatında debatları, tematik işçi qruplarının müzakirələrini, paralel sessiyaları və tərəfdaş təşkilatların təqdimatlarını əhatə edir.
Təşkilatçıların açıqlamasına görə, forumun əsas məqsədi sosial xidmətlərdə süni intellektin və rəqəmsal analitikanın tətbiqi imkanlarını müzakirə etməkdir.
Müzakirələrdə dövlət-vətəndaş münasibətlərində əlçatanlığın, çevikliyin və şəffaflığın artırılmasına yönələn innovativ həllərin müəyyənləşdirilməsi nəzərdə tutulub.
Tədbirin digər hədəfi beynəlxalq təcrübə mübadiləsini genişləndirməkdir. Son illərdə Xankəndi beynəlxalq forum və konfransların keçirildiyi məkanlardan birinə çevrilib.
