Regionlarda qızlar üçün süni intellekt düşərgəsi təşkil olunur

Texnologiya sahəsində qadın iştirakını artırmaq məqsədilə yeni təşəbbüs həyata keçirilir. Trendyol, Paşa Holding və Women in Tech Azerbaijan əməkdaşlığı ilə Gəncə və Mingəçevirdə qızlar üçün 2 günlük süni intellekt (AI) düşərgəsi təşkil olunacaq.

Tədbir Beynəlxalq İKT-də Qızlar Günü çərçivəsində keçirilir və regionlarda yaşayan gənc qızların texnologiya sahəsinə marağını artırmağı hədəfləyir.

Düşərgə iki şəhərdə baş tutacaq:

• 24–25 aprel tarixlərində Gəncə
• 26–27 aprel tarixlərində Mingəçevir
  
  

İştirakçılar üçün proqram həm nəzəri, həm də praktiki bilikləri əhatə edir. Düşərgə müddətində iştirakçılar süni intellekt alətləri ilə tanış olacaq, effektiv “prompt” yazma bacarıqları əldə edəcək və AI texnologiyalarının yaratdığı yeni imkanları praktiki şəkildə öyrənəcəklər.

Təşkilatçılar bildirir ki, proqram xüsusilə texnologiyaya yeni başlayanlar üçün nəzərdə tutulub və iştirakçılara real alətlərlə işləmək imkanı yaradacaq. Məqsəd yalnız nəzəri bilik vermək deyil, eyni zamanda gənc qızların bu sahədə öz potensiallarını kəşf etmələrinə dəstək olmaqdır.

Qeyd edək ki, düşərgədə iştirak üçün yerlər məhduddur və qeydiyyat əvvəlcədən aparılır. Maraqlanan şəxslər qeydiyyat üçün təşkilatçıların rəsmi platforması üzərindən müraciət edə bilərlər.