Ötən gün “Metro Hackathon”un böyük maraqla gözlənilən final mərhələsi keçirildi. Üç gün davam edən yarışın sonunda iştirakçı komandalar hazırladıqları innovativ həlləri münsiflər heyətinə təqdim ediblər.
Final mərhələsində ümumilikdə 18 komanda çıxış edib. Hər komanda cəmi 4 dəqiqə ərzində öz məhsulunu təqdim edərək ideyasını əsaslandırmağa çalışıb. Qısa müddətdə hazırlanmasına baxmayaraq, təqdim olunan layihələr innovativ yanaşma və praktik tətbiq imkanları ilə diqqət çəkib.
Münsiflər heyətinin qiymətləndirməsinə əsasən, birinci yerə “Xətai” komandası layiq görülüb. Qalib komanda 5 000 manat məbləğində pul mükafatı ilə təltif edilib.
İkinci yeri “Gənclik” komandası tutub və 3 000 manat mükafat qazanıb. Üçüncü yerdə isə “Sahil” komandası qərarlaşıb və bu komandaya 1 000 manat təqdim olunub.
Qeyd edək ki, “Metro Hackathon” Bakı Metropoliteninin təşəbbüsü ilə təşkil olunub. Layihənin təşkilatçılığı SUP VC tərəfindən həyata keçirilib, baş sponsor qismində isə Crocusoft LLC çıxış edib.
Tədbir çərçivəsində təqdim olunan layihələr şəhər infrastrukturunun inkişafı, nəqliyyat sisteminin optimallaşdırılması və sərnişin təcrübəsinin yaxşılaşdırılması kimi istiqamətləri əhatə edib. Hackathon iştirakçıları qısa müddətdə real problemlərə innovativ həllər təqdim etməklə həm texnoloji bacarıqlarını nümayiş etdirib, həm də gələcək layihələr üçün potensiallarını ortaya qoyublar.
