“m10” üzərindən artıq 140+ ölkəyə real vaxtda pul göndərmək mümkün olacaq

Azərbaycanda rəqəmsal maliyyə xidmətləri sahəsində yeni əməkdaşlıq həyata keçirilib. “Bir” ekosistemi Böyük Britaniyanın qlobal ödəniş platforması Paysend ilə tərəfdaşlıq çərçivəsində ölkədə real vaxt rejimində beynəlxalq pul köçürmələri xidmətini istifadəyə verib.

Yeni xidmət “m10” rəqəmsal pul kisəsi üzərindən təqdim olunur və istifadəçilərə 140-dan çox ölkəyə mobil telefon vasitəsilə birbaşa pul göndərmək imkanı yaradır. Həllin əsas məqsədi sərhədlərarası ödəniş prosesini daha sürətli, rahat və şəffaf etməkdir.

Şirkətin açıqlamasına əsasən, xidmət xüsusilə xaricdə yaşayan ailə üzvlərinə vəsait göndərilməsi, səyahət zamanı maliyyə əməliyyatlarının həyata keçirilməsi və gündəlik beynəlxalq ödəniş ehtiyaclarının qarşılanması üçün nəzərdə tutulub.

Rəqəmsal ödəniş həllərinin inkişaf etdiyi dövrdə bu cür xidmətlər istifadəçilərə bank şöbəsinə getmədən, bir neçə addımda beynəlxalq köçürmə əməliyyatlarını tamamlamağa imkan verir.

Hazırda “Bir” ekosistemi 5 milyondan çox istifadəçiyə xidmət göstərir və ölkədə rəqəmsal maliyyə xidmətlərinin genişlənməsi istiqamətində fəaliyyətini davam etdirir. Yeni əməkdaşlıq həm istifadəçi təcrübəsinin təkmilləşdirilməsi, həm də beynəlxalq maliyyə xidmətlərinə çıxışın daha əlçatan olması baxımından diqqət çəkir.