Instagram postlarında musiqini sonradan dəyişmək mümkün olacaq

Instagram istifadəçilərinin uzun müddətdir gözlədiyi yeniliklərdən biri istifadəyə verilir. Platforma təqdim etdiyi "Replace Audio" funksiyası ilə artıq paylaşılan postların musiqisini sonradan dəyişməyə imkan yaradacaq.

Yeni funksiya sayəsində istifadəçilər paylaşdıqları postun audio hissəsini istənilən vaxt yeniləyə biləcəklər. Bu isə xüsusilə trend musiqilərdən istifadə edən kontent yaradıcıları və brendlər üçün böyük üstünlük hesab olunur.

Ən vacib məqamlardan biri odur ki, musiqi dəyişdirildikdə postun bəyənmələri, şərhləri, baxış sayı silinməyəcək. Beləliklə, istifadəçilər yalnız musiqini yeniləyərək postun statistik göstəricilərini itirmədən məzmunlarını önə çıxara biləcəklər.

Bu yenilik həm də səhv seçilmiş musiqini düzəltmək və ya müəllif hüquqları ilə bağlı yarana biləcək problemlərin qarşısını almaq baxımından da faydalı hesab olunur. Eyni zamanda mövsümi kampaniyalar və ya yeni trend musiqilər ortaya çıxdıqda köhnə paylaşımları yenidən uyğunlaşdırmaq daha asan olacaq.

"Replace Audio" funksiyası mərhələli şəkildə istifadəçilərə təqdim edilir və yaxın müddətdə daha geniş auditoriya üçün əlçatan olması gözlənilir.