İctimai nəqliyyatda yenilik: Azərbaycana üztanıma ilə ödəniş gəlir
18 May,2026247 baxış
Bakı Dəmiryol Vağzalında yaxın günlərdə yeni ödəniş sistemi istifadəyə verilə bilər. Məlumata görə, burada üztanıma texnologiyası ilə ödəniş üçün hazırlıq işləri aparılır. Bu sistem tətbiq olunarsa, Azərbaycanda ictimai nəqliyyatda ilk belə yenilik olacaq.
Yeni sistem sərnişinlərə kart və ya nağd pul istifadə etmədən ödəniş etməyə imkan verəcək. İstifadəçi əvvəlcədən sistemdə qeydiyyatdan keçəcək və ödəniş zamanı kamera onun üzünü tanıyaraq əməliyyatı avtomatik həyata keçirəcək. Bu proses cəmi bir neçə saniyə çəkəcək.
Üztanıma ilə ödəniş texnologiyası artıq Çin, ABŞ, Böyük Britaniya və Cənubi Koreya kimi ölkələrdə müəyyən sahələrdə istifadə olunur. Bu yeniliyin Azərbaycanda tətbiqi isə nəqliyyatda rəqəmsal həllərin genişlənməsi baxımından diqqət çəkir.
Əgər sistem uğurlu olarsa, gələcəkdə digər ictimai nəqliyyat vasitələrində də oxşar ödəniş üsullarının tətbiqi mümkün ola bilər.
