Google Vids sənədləri saniyələr ərzində videoya çevirəcək

Google süni intellekt imkanlarını video hazırlama prosesinə də inteqrasiya etməyə davam edir. Şirkətin Google Vids platformasına əlavə etdiyi yeni imkan istifadəçilərə Google Docs, PDF və Word fayllarını qısa videolara çevirməyə imkan verir.

Yeni funksiya ilə istifadəçi hazır sənədi platformaya əlavə edir, süni intellekt isə həmin məzmunu analiz edərək video üçün ssenari hazırlayır. Bundan sonra uyğun vizuallar və səsləndirmə avtomatik şəkildə formalaşdırılır.

Bu yanaşma xüsusilə təqdimatlar, hesabatlar, təlim materialları və iş sənədlərinin daha yığcam və vizual formada təqdim olunmasını asanlaşdıra bilər. Beləliklə, uzun mətnləri əl ilə ssenariyə çevirmək, kadr seçmək və səsləndirmə hazırlamaq üçün ayrıca vaxt sərf etməyə ehtiyac azalır.