Bolt for Business Baku ID 2026-nın dəstək tərəfdaşı oldu

Korporativ nəqliyyat həlləri təklif edən “Bolt for Business” “Baku ID 2026” innovasiya festivalının dəstək tərəfdaşı olub. Festival Qafqaz, Mərkəzi Asiya, Yaxın Şərq və Şimali Afrika regionunu əhatə edən startap və investisiya platformasıdır.

Tərəfdaşlıq çərçivəsində tədbir iştirakçıları Baku ID 2026-ya gediş və qayıdış səfərlərində 30 faiz endirimdən yararlana biləcək. Tərəfdaş təşkilatların əməkdaşları üçün ayrıca “Bolt for Business” hesab balansı da nəzərdə tutulub.

Xidmət şirkətlərə əməkdaşların, qonaqların və tərəfdaşların nəqliyyat xərclərini mərkəzləşdirilmiş şəkildə idarə etməyə və monitorinq etməyə imkan verir.

Bolt 2013-cü ildə Estoniyada startap kimi fəaliyyətə başlayıb. Hazırda platforma 50-dən çox ölkədə və 850-dən artıq şəhərdə fəaliyyət göstərir; 200 milyondan çox müştəriyə, həmçinin 4,5 milyon sürücü, kuryer və biznes tərəfdaşına xidmət edir.

“Bolt for Business”in rəhbəri Salman Babazadənin sözlərinə görə, Baku ID biznes, startap və investisiya ictimaiyyətini bir araya gətirən mühüm platformadır. O qeyd edib ki, tərəfdaşlıq həm bu mühitə dəstək, həm də iştirakçılar üçün əlavə rahatlıq deməkdir.

Əvvəlki Baku ID festivallarında 13 500-dən çox iştirakçı və 375-dən artıq startap yer alıb.