AI Academy ilk məzunlarını verdi, süni intellekt kadrları artır

Milli Süni İntellekt Mərkəzinin təşkil etdiyi "AI Academy" tədris proqramının ilk məzun mərasimi oktyabrın 20-də Bakıda keçirilib. Bu, akademiyanın yaradılmasından sonra ilk buraxılışıdır.

Mərasimdə Elm və Təhsil Nazirliyinin, Rəqəmsal İnkişaf və Nəqliyyat Nazirliyinin rəsmi nümayəndələri, deputatlar və digər dəvətlilər iştirak edib.

Tədbirdə çıxış edən rəqəmsal inkişaf və nəqliyyat nazirinin müavini Rəşad Həsənov ölkədə rəqəmsal inkişaf sahəsində reallaşdırılan layihələr barədə məlumat verib.

O, innovativ texnologiyaların tətbiqinin və rəqəmsal transformasiya prosesinin sürətləndirilməsinin vacibliyini vurğulayıb.

Elm və təhsil nazirinin müavini Həsən Həsənli isə Azərbaycanda aparılan kadr hazırlığı prosesinə diqqət yönəldib və gənc mütəxəssislərin bilik və bacarıqlarının inkişafı istiqamətində görülən işlər barədə ətraflı danışıb. Çıxışlardan sonra məzunların təltifləndirmə mərasimi baş tutub.

"AI Academy" AZCON Holding şirkətlər qrupuna daxil olan Milli Süni İntellekt Mərkəzi tərəfindən yaradılmış tədris platformasıdır.

Akademiya tətbiqi riyaziyyatın əsaslarından başlayaraq süni intellektin dərin qatlarına qədər geniş mövzuları əhatə edən proqramlar təqdim edir. Süni intellekt mühəndisi olmaq üçün zəruri biliklər burada sıfırdan və tam təqaüdlü formada tədris olunur.

Tam təqaüdlü model proqramı ödəniş imkanından asılı olmayaraq namizədlərə açıq saxlayır. Bu yanaşma süni intellekt sahəsində kadr çatışmazlığının aradan qaldırılmasına yönəlmiş addımlardan biri kimi dəyərləndirilir.