ABB süni intellekt infrastrukturunu gücləndirir: yeni GPU serverləri üçün tender elan olundu

Azərbaycan Beynəlxalq Bankı (ABB) “NVIDIA” HGX B200 əsaslı “Dell GPU” serverlərinin satın alınması məqsədilə tender elan edib.

Marja xəbər verir ki, tenderdə iştirak etmək istəyən şirkətlərin müvafiq sahə üzrə ən azı 3 illik iş təcrübəsinə malik olması tələb olunur. İddiaçılar təkliflərini 10 aprel tarixinə qədər ABB-yə təqdim edə bilərlər.

Məlumata görə, sözügedən serverlər bankın süni intellekt layihələri üçün nəzərdə tutulub. Tenderə çıxarılan avadanlıqlar yüksək hesablama gücü ilə seçilir və əsasən böyük dil modellərinin (LLM) öyrədilməsi və tətbiqi üçün istifadə olunur.

Bu tip GPU əsaslı serverlər çatbotlar, səsli köməkçilər, sənəd analizi, OCR texnologiyaları, risk və fırıldaqçılıq aşkarlanması, həmçinin böyük həcmli məlumatların emalı və paralel hesablamalar kimi sahələrdə geniş tətbiq edilir. Eyni zamanda, bəzi hallarda yüksək performanslı hesablama (HPC) proseslərində də istifadə olunur.

Qeyd edək ki, ABB-də hazırda müxtəlif istiqamətlər üzrə tətbiq olunan süni intellekt modellərinin sayı 176-ya çatıb. Bankın açıqlamasına əsasən, bu modellər artıq 34.5 milyon manatdan çox müsbət maliyyə təsiri yaradıb. Hazırda isə ABB daxilində süni intellekt əsaslı 69 layihə icra olunur.

Bununla yanaşı, ABB yaxın zamanda AI-khan və AI-nur adlı süni intellekt əsaslı rəqəmsal köməkçiləri də istifadəyə verib. Bu sistemlər müştərilərə bank əməliyyatlarını səsli komandalar vasitəsilə həyata keçirmək və müxtəlif suallara operativ cavab almaq imkanı yaradır.

Ekspertlərin fikrincə, yeni GPU serverlərinin alınması ABB-nin dayanıqlı və güclü süni intellekt infrastrukturunun qurulmasına yönəlmiş strateji addımlarından biridir. Bu isə bankın rəqəmsal transformasiya prosesini daha da sürətləndirəcək.