ABB Global AI Innovation Awards 2026-nın qalibləri sırasında yer alıb
Azərbaycanın ABB bankı "The Digital Banker" platformasının "Global AI Innovation Awards 2026" mükafat proqramında Azərbaycan üzrə qalib elan edilib. Bank "Best AI-Powered Retail Bank – Azerbaijan" nominasiyasında birinci olub.
Qərar oktyabrın 21-də açıqlanıb. Mükafatın təşkilatçısı olan "The Digital Banker" qlobal maliyyə sektoru üzrə ixtisaslaşan beynəlxalq platformadır və baş ofisi Sinqapurda yerləşir.
Mükafat bankın süni intellekt əsaslı bankçılıq həlləri nəzərə alınaraq verilib. Qiymətləndirmədə müştərilər üçün hazırlanmış süni intellekt əsaslı fərdi maliyyə menecerləri — AI-nur və AI-khan — xüsusi vurğulanıb.
"Global AI Innovation Awards" proqramı maliyyə sektorunda süni intellekt texnologiyalarının tətbiqi ilə əhəmiyyətli yeniliklər ortaya qoyan qurumları müəyyənləşdirir.
Proqram çərçivəsində bir neçə istiqamət qiymətləndirilir: süni intellekt əsaslı məhsul və xidmətlər, müştəri təcrübəsinin inkişafı, məlumatlara əsaslanan qərarvermə, risklərin idarə edilməsi, əməliyyat səmərəliliyi və innovativ biznes modellərinin qurulması.
Namizədləri platformanın araşdırma komandası, süni intellekt üzrə mütəxəssislər və müstəqil beynəlxalq ekspertlər dəyərləndirir. Münsiflər heyətində KPMG, Bain & Company və Accenture kimi beynəlxalq məsləhətçi şirkətlərin nümayəndələri təmsil olunur.
"The Digital Banker" pərakəndə bankçılıq sahəsində "Global Retail Banking Innovation Awards" mükafatlarını 2018-ci ildən etibarən elan edir. Süni intellektə həsr olunmuş ayrıca proqram isə sektorda bu texnologiyanın artan rolunu əks etdirir.
Azərbaycan bank bazarında son illərdə süni intellekt həllərinin tətbiqi genişlənir. Beynəlxalq mükafat proqramlarında yerli bankların təmsilçiliyi isə bu istiqamətdə görülən işlərin xaricdə də müşahidə olunduğunu göstərir.
