“Vistar” Mükəmməllik Mərkəzinin III təlim dalğasına müraciət başlayıb!
Gənclərin innovasiya, texnologiya və sahibkarlıq sahələrində bilik və bacarıqlarının inkişafına yönəlmiş “Vistar” Mükəmməllik Mərkəzinin III təlim dalğasına müraciət qəbulu başlayıb.
Proqram iştirakçılara süni intellekt, peyk texnologiyaları, innovasiya və sahibkarlıq istiqamətlərində həm nəzəri, həm də praktiki biliklər əldə etmək imkanı yaradacaq. Təlim müddətində iştirakçılar beynəlxalq ekspertlərin təcrübəsindən yararlanacaq, mentor dəstəyi alacaq və öz innovativ ideyalarını inkişaf etdirərək real layihələrə çevirmək şansı qazanacaqlar.
Proqram çərçivəsində innovasiya və sahibkarlıq üzrə praktiki sessiyalar, süni intellekt və peyk texnologiyalarına həsr olunmuş ekspert çıxışları, yumşaq bacarıqların inkişafı üzrə təlimlər, eləcə də beynəlxalq mentorlarla əməkdaşlıq imkanları təqdim olunacaq.
Təlim proqramının yekununda iştirakçılar hazırladıqları layihələri Demo Day tədbirində təqdim edərək investorlar, sahə ekspertləri və innovasiya ekosisteminin nümayəndələri qarşısında çıxış etmək imkanı əldə edəcəklər.
Təlimlər İsrailin qabaqcıl təhsil və innovasiya ekosistemini təmsil edən mütəxəssislərin iştirakı ilə həyata keçiriləcək. Bu, iştirakçılara beynəlxalq təcrübəni yaxından öyrənmək və qlobal innovasiya mühitinə inteqrasiya olmaq üçün əlavə imkanlar yaradacaq.
“Vistar” Mükəmməllik Mərkəzinin III təlim dalğasında iştirak etmək istəyən namizədlər 27 iyun 2026-cı il tarixinədək müraciət edə bilərlər.
