Universitet tələbələri Azərbaycanda rəqibi olmayan startap yaratdılar!
Uşaqlıqdan dost olan Amin Əliyev və Murad Mirzəyev bu gün birlikdə startap quran gənclər sırasındadır. Eyni məhlədə böyüyən və illərdir dostluqlarını qoruyan təsisçilər ideyalarını real biznesə çevirərək “AdMeIn” platformasını yaradıblar.
AdMeIn taksidaxili rəqəmsal reklam platforması kimi fəaliyyət göstərir və artıq bazarda ilk uğurlarını qazanmağa başlayıb. Layihənin əsas məqsədi sərnişinlərin taksidə keçirdiyi vaxtı daha faydalı məzmuna çevirmək və bizneslər üçün yeni reklam kanalı yaratmaqdır.
Layihə ideya olaraq 2023-cü ildən mövcud olsa da, aktiv tətbiq mərhələsinə 2025-ci ilin sentyabrından başlanılıb. Bu müddət ərzində test prosesləri həyata keçirilib, avadanlıqlar quraşdırılıb və demo reklam kampaniyaları icra olunub. Startapın rəsmi bazar çıxışı isə cari ilin fevral ayında baş tutub.
Qeyd edək ki, Murad Mirzəyev hazırda Berlin Texniki Universitetinin 4-cü kurs tələbəsidir. Amin Əliyev isə ADA Universitetinin 2-ci kursunda təhsil alır. AdMeIn onların tələbəlik dövründə formalaşdırdığı və reallaşdırdığı innovativ təşəbbüslərdən biridir.
