Texnopark rezidentlərinə 20 illik vergi güzəştləri təsdiqlənib

Azərbaycan Prezidentinin 22 oktyabr 2026-cı il tarixli fərmanları ilə texnologiya və innovasiya sahəsində vergi, sosial sığorta və rezidentlik qaydalarına dair genişmiqyaslı dəyişikliklər təsdiqlənib.

2027-ci il yanvarın 1-dən rezidentlik şəhadətnaməsi alan və müəyyən edilmiş meyarlara cavab verən şəxslər bu fəaliyyətdən əldə etdikləri gəlir və mənfəət, ödənilən dividend, istifadə etdikləri əmlak və torpaq üzrə vergi güzəştlərindən yararlanacaq. Güzəşt müddəti 20 ilə qədər uzadılıb.

Rezidentlərin müvafiq fəaliyyət üzrə işçilərinin əmək gəlirlərinə 20 il ərzində 0 faiz gəlir vergisi dərəcəsi tətbiq olunacaq. Yeni rezidentlərin cəlb etdiyi işçilər üzrə sosial sığorta haqqı seçimi müddəti isə 10 ildən 20 ilə qədər artırılıb.

Güzəştlər yalnız texnopark ərazisində deyil, ondan kənarda fəaliyyət göstərən rezidentlərə də şamil ediləcək. İri sahibkarlıq subyektləri üçün şərt qoyulub: ixrac göstəriciləri yerinə yetirilməli və ixracdan gələn gəlir Azərbaycandakı hesablara daxil olmalıdır.

İnnovativ məhsulun hazırlanması ilə bağlı bəzi əməliyyat xərcləri 2,5 əmsalı ilə vergiyə cəlb olunan gəlirdən çıxılacaq. Ayrıca uçot aparılan avadanlıq üzrə amortizasiya normalarına isə 2 əmsalı tətbiq ediləcək.

Startap maliyyələşməsi də dəyişikliklərə daxil edilib. Akkreditasiya olunmuş investorların startaplara qoyduğu investisiyanın bir hissəsi vergiyə cəlb edilən gəlirdən çıxıla biləcək. Kraudfandinq və venchur investisiyalarından gəlirlər üzrə 10 illik vergi güzəştləri nəzərdə tutulur.

Startapların və rezidentlərin bulud, platforma, proqram təminatı və API xidmətlərinə görə qeyri-rezidentlərə etdiyi ödənişlərə 20 illik vergi və ƏDV güzəştləri tətbiq olunacaq.

Dəyişikliklər 27 fevral 2026-cı il tarixli 953 nömrəli Sərəncamla təsdiqlənmiş 2026-2028-ci illər üçün rəqəmsal inkişafın sürətləndirilməsinə dair Fəaliyyət Planı çərçivəsində hazırlanıb.