Texnologiyalar parkı əsasnaməsinə süni intellekt anlayışı əlavə olunub
Prezident İlham Əliyev "Texnologiyalar parkı haqqında Nümunəvi Əsasnamə"də dəyişiklik edən yeni fərman imzalayıb. Sənədin ilkin variantı 2014-cü il mayın 15-də təsdiq edilmişdi.
Dəyişikliklərlə əsasnaməyə bir sıra yeni anlayışlar daxil edilib. Bunların arasında "rəqəmsal texnologiya", "süni intellekt texnologiyası", "innovasiya məhsulu", "kibertəhlükəsizlik" və "bulud hesablama xidmətləri", habelə elmi tədqiqat, layihə-axtarış və təcrübə-konstruktor işləri ilə bağlı tərif var.
Sənədə görə, süni intellekt texnologiyası insan zəkası tələb edən funksiyaları — proqnozlaşdırma, təsnifatlaşdırma, nitqin və şəklin tanınması, mətn yaradılması, dil tərcüməsi və problemlərin həlli kimi əməliyyatları — yerinə yetirən alqoritmik sistem kimi müəyyən olunur.
Əsasnamədə texnoparkın qeyri-rezidenti anlayışı da dəqiqləşdirilib. İdarəedici təşkilatla, yaxud operatora məxsus obyektlər üzrə operatorla icarə müqaviləsi bağlayaraq texnopark ərazisində rezidentlərə mal, iş və xidmət təqdim edən hüquqi şəxslər və fərdi sahibkarlar bu statusa aid ediləcək.
İnfrastruktur obyektlərinin taleyi ilə bağlı qaydalar da yenilənib. İdarəetmə sazişi başa çatdıqda operatorun mülkiyyətindəki obyektlər tərəflərin razılığı və ya sazişdə göstərilən kompensasiya şərtləri əsasında idarəedici təşkilatın mülkiyyətinə keçə bilər.
Elmi tədqiqat və təcrübə-konstruktor işləri məqsədilə rezidentin öz vəsaiti hesabına qurduğu istehsal sahəsi, avadanlıq və qurğular isə rezidentin mülkiyyəti sayılır. Rezidentə və qeyri-rezidentə icarəyə verilmiş infrastrukturun yazılı razılıq olmadan üçüncü şəxslərə yenidən icarəyə verilməsinə və ya müqavilədə nəzərdə tutulmayan məqsədlərlə istifadəsinə isə yol verilmir.
Fərmana əsasən, Nazirlər Kabineti Texnologiyalar Parkının Ekspertlər Şurası haqqında əsasnaməni təsdiqləyən 2015-ci il qərarının təkmilləşdirilməsi üzrə üç ay ərzində tədbirlər görərək dövlət başçısına məlumat verməlidir.
2027-ci il yanvarın 1-dək verilmiş texnologiyalar parkı qeydiyyat şəhadətnamələri qüvvədə qalır. Həmin rezidentlər fəaliyyətlərini ilin sonunadək yeni tələblərə uyğunlaşdırmalıdırlar.
