“Startup School 4” çərçivəsində “Açıq qapı” günü keçirildi

İnnovasiya və sahibkarlıq sahəsində fəaliyyət göstərənlər üçün mühüm platformalardan biri olan “Startup School 4: Beş qitə – 500 Startap” proqramı çərçivəsində “Açıq qapı” günü təşkil olunub. Tədbir İqtisadi İslahatların Təhlili və Kommunikasiya Mərkəzi-nin “Enterprise Azerbaijan” portalının təşəbbüsü ilə baş tutub.

Görüşdə startap ekosisteminin nümayəndələri, ali təhsil müəssisələrinin mütəxəssisləri və innovasiya sahəsinə maraq göstərən iştirakçılar bir araya gəlib. Tədbirin əsas məqsədi proqramın imkanlarını təqdim etmək, iştirakçıların suallarını cavablandırmaq və startapların inkişafına dair fikir mübadiləsi aparmaq olub.

Portalın rəhbəri İsa Qasımov çıxışında bildirib ki, proqramın ən vacib mərhələlərindən biri olan “Demo Day” bu il TEI Forum 2026 ilə paralel şəkildə keçiriləcək. Onun sözlərinə görə, seçiləcək 50 perspektivli startap Bakı Konqres Mərkəzində təşkil olunacaq forumda öz məhsul və xidmətlərini nümayiş etdirmək imkanı əldə edəcək. Bu isə onların investorlar və biznes nümayəndələri ilə birbaşa əlaqə qurmasına şərait yaradacaq.

Tədbirdə həmçinin layihə meneceri Aydan Hüseynzadə proqramın əsas üstünlükləri barədə ətraflı məlumat verib. Bildirilib ki, “Startup School 4” iştirakçılara peşəkar mentorluq, praktiki təlimlər, innovativ ideyaların kommersiyalaşdırılması və beynəlxalq bazarlara çıxış imkanları təqdim edir. Proqramın əsas fərqləndirici xüsusiyyətlərindən biri isə 5 qitədən startapları bir araya gətirməsidir.

Görüş çərçivəsində universitetlər, startaplar və biznes qurumları arasında əməkdaşlığın genişləndirilməsi imkanları da müzakirə olunub. Xüsusilə startapların real sektorla inteqrasiyası, investisiya imkanlarının artırılması və layihələrin praktik mühitdə tətbiqi məsələləri diqqət mərkəzində olub.

Sonda qeyd edilib ki, proqramda iştirak etmək istəyənlər üçün qeydiyyat prosesi 15 may tarixində başa çatır. Bu tarix startaplar üçün son müraciət imkanı hesab olunur.