2026-cı ilin yanvar–mart ayları ərzində 29 mikro və kiçik sahibkar “Startap” şəhadətnaməsi almaq üçün Kiçik və Orta Biznesin İnkişafı Agentliyi-nə (KOBİA) müraciət edib. Müraciətlərə baxıldıqdan sonra Ekspertlər Şurasının qərarı ilə 16 sahibkara şəhadətnamə təqdim olunub.
Qərar Nazirlər Kabineti tərəfindən 29 yanvar 2021-ci ildə təsdiqlənmiş “Startapın müəyyən olunması meyarları”na uyğun olaraq verilib. Şəhadətnamə alan sahibkarların 10-u hüquqi, 6-sı isə fiziki şəxsdir. Onlardan 10-u Bakı şəhərində, 6-sı isə regionlarda fəaliyyət göstərir.
Seçilmiş startaplar əsasən istehsal və xidmət sahələrini əhatə edir. Layihələrin istiqamətləri sırasında e-ticarət və rəqəmsal marketinq, səhiyyə texnologiyaları, onlayn oyunların hazırlanması, turizm xidmətləri və rəqəmsal ödəniş sistemləri kimi innovativ sahələr yer alır.
Qeyd edək ki, “Startap” şəhadətnaməsi əldə edən KOB subyektləri bu statusu aldıqları tarixdən etibarən innovasiya fəaliyyətindən əldə etdikləri gəlirlər üzrə 3 il müddətinə mənfəət və ya gəlir vergisindən azad olunurlar.
Şəhadətnamənin verilməsi və ya imtina edilməsi barədə qərar KOBİA yanında fəaliyyət göstərən Ekspertlər Şurasının rəyi əsasında qəbul edilir. 12 nəfərdən ibarət olan Şura müxtəlif dövlət qurumlarının nümayəndələri və müstəqil ekspertlərdən formalaşıb.
Mikro və kiçik sahibkarlıq subyektləri “Startap” şəhadətnaməsi əldə etmək üçün KOBİA-ya müraciət edə bilərlər.
