Səudiyyə Ərəbistanında Azərbaycan-Səudiyyə Dəyirmi Masası keçirilib

Səudiyyə Ərəbistanının Məkkə şəhərində keçirilən “2-ci Məkkə Halal Forumu” çərçivəsində Azərbaycan və Səudiyyə Ərəbistanı arasında biznes əlaqələrinin genişləndirilməsi məqsədilə Dəyirmi Masa təşkil olunub. Tədbir Kiçik və Orta Biznesin İnkişafı Agentliyi (KOBİA) və Səudiyyə Ərəbistanının Palatalar Federasiyasının birgə təşkilatçılığı ilə baş tutub.

Dəyirmi Masada Azərbaycan tərəfindən kənd təsərrüfatı, qida, sənaye, turizm və xidmət sektorlarında fəaliyyət göstərən sahibkarlar iştirak ediblər. Tədbirdə Səudiyyə Ərəbistanının Mərkəzi Asiya ölkələri üzrə İşgüzar Şurasının sədr müavini Əli Alotaibi və KOBİA-nın İdarə Heyətinin sədri Orxan Məmmədov çıxış edərək, iki ölkə arasında biznes və investisiya sahəsində əməkdaşlıq perspektivləri, KOB-lar arasında əlaqələrin genişləndirilməsi və halal sənaye sahəsində iş adamları arasında əməkdaşlığın gücləndirilməsi məsələləri barədə fikirlərini bölüşüblər.

Dəyirmi Masa çərçivəsində biznes nümayəndələri arasında “B2B” görüşlər keçirilib, sahibkarlar öz fəaliyyətləri və əməkdaşlıq imkanları barədə məlumat verib, idxal və ixrac potensialı müzakirə olunub.

Bundan əlavə, KOBİA nümayəndələri İslam Ticarət və İnkişaf Palatasının (ICCD) Baş katibi Yusif Xələvi ilə görüşərək halal sənaye və bu il Bakıda keçiriləcək AZHAB Forumuna dair fikir mübadiləsi aparıblar. Həmçinin, Nigeriyanın Ticarət, Sənaye, Mədən və Kənd Təsərrüfatı Palataları Assosiasiyasının prezidenti Jani İbrahim ilə keçirilən görüşdə institusional əməkdaşlıq və biznes əlaqələrinin təşviqi müzakirə olunub.

Bu tədbir Azərbaycan və Səudiyyə Ərəbistanı arasında iqtisadi və ticari əlaqələrin inkişafına töhfə vermək, eləcə də sahibkarlar üçün yeni əməkdaşlıq imkanları yaratmaq baxımından mühüm əhəmiyyət kəsb edir.

Mənbə: KOB