SABAH.HUB və Xsolla arasında əməkdaşlıq memorandumu imzalanıb

SABAH.HUB və qlobal oyun texnologiyaları şirkəti Xsolla arasında ikitərəfli əməkdaşlıq memorandumu imzalanıb.

Memorandum çərçivəsində tərəflər təhsil təşəbbüslərinin həyata keçirilməsi, gənc istedadların inkişafı və karyera imkanlarının genişləndirilməsi istiqamətində birgə fəaliyyət göstərəcəklər. Əməkdaşlıq həmçinin sahibkarlığın təşviqi, startap ekosisteminin inkişafı və beynəlxalq tərəfdaşlıqların gücləndirilməsini də əhatə edir.

Tərəflərin əsas məqsədi tələbələri, sahibkarları, investorları və qlobal texnologiya liderlərini vahid platformada bir araya gətirməkdir. Bu əməkdaşlıq vasitəsilə Azərbaycanda innovasiya və texnologiya sahəsində yeni imkanların yaradılması, xüsusilə oyun sənayesinin inkişafının dəstəklənməsi hədəflənir.

SABAH.HUB və Xsolla arasında qurulan tərəfdaşlığın ölkədə innovasiya ekosisteminin güclənməsinə, beynəlxalq əlaqələrin genişlənməsinə və gənclərin qlobal texnologiya bazarına inteqrasiyasına töhfə verəcəyi gözlənilir.

Qeyd edək ki, Xsolla oyun sənayesi üçün ödəniş, kommersiya və biznes inkişafı həlləri təqdim edən beynəlxalq texnologiya şirkətlərindən biridir. Şirkətlə qurulan əməkdaşlıq Azərbaycanın oyun sənayesi və startap ekosisteminin beynəlxalq səviyyədə inkişafı baxımından mühüm addım hesab olunur.