Parvaz startap studiyası Azərbaycanda fəaliyyətə başlayıb
Azərbaycanda "Parvaz" adlı yeni startap studiyası fəaliyyətə başlayıb. Layihənin təsisçiləri Aqşin Rəcəbov, Ayaz İbrahimov və Alastan Əsədzadədir.
Studiya klassik akselerator modelindən fərqli yanaşma tətbiq edir. Burada ideya sahibləri ilə məhsulu idarə edəcək komanda ayrı-ayrı rollar kimi götürülür.
İş prinsipi belədir: komanda məhsulun ilk versiyasını — dizayn və koddan ibarət işlək prototipi hazırlayır, sonra isə onu təsisçiyə ötürür. Bu mərhələdə tərəflər pay bölgüsü üzrə razılaşma əldə edir.
Vaxt keçdikcə təsisçinin payı artır, studiya isə kiçilən, lakin qorunan iştirak payını saxlayır. Model təsisçini erkən mərhələdə texniki komanda axtarışından azad etməyə yönəlib.
Studiya dörd fərqli giriş nöqtəsi təklif edir. Birincisi — mövcud layihəni təsisçi kimi idarə etmək; ikincisi — ideya ilə müraciət edib prototip hazırlatmaq.
Üçüncü variant artıq məhsulu və istifadəçiləri olan komandaların proqrama qoşulmasıdır. Dördüncüsü isə studiyanın şəbəkəsi vasitəsilə həmtəsisçi tapmaq imkanıdır.
Hazırda portfeldə üç məhsul var. "Komissio" Stripe əsaslı SaaS layihələri və Shopify mağazaları üçün affiliate proqramıdır, "PropCraft" agentliklər üçün kommersiya təklifi hazırlayan proqram təminatıdır — hər ikisi işlək vəziyyətdədir. "Rawuser" isə süni intellekt əsasında vebsayt personalizasiyası təklif edir və pilot mərhələsindədir.
Studiya genişlənmə üçün prioritet bazarlar kimi Mərkəzi Asiya və Yaxın Şərqi müəyyənləşdirib. Müraciətlər studiyanın rəsmi saytı üzərindən qəbul olunur.
