“Openwave” hakatonunun qalibləri məlum oldu!

İnnovasiya və texnologiya sahəsində gənclərin potensialını üzə çıxarmağı hədəfləyən ilk “Openwave” hakatonu uğurla yekunlaşıb. İnnovasiya və Rəqəmsal İnkişaf Agentliyi, Nərimanov Rayon İcra Hakimiyyəti və Tedspace-in birgə təşkilatçılığı ilə keçirilən layihə dövlət-vətəndaş əməkdaşlığının rəqəmsal həllər vasitəsilə inkişafına töhfə verməyi qarşısına məqsəd qoyub. 48 saat davam edən intensiv kodlaşdırma marafonunda seçilmiş 15 komanda Nərimanov rayonunun qarşılaşdığı real problemlərin həlli üçün innovativ və tətbiq oluna bilən prototiplər hazırlayıb. İştirakçılar qısa müddət ərzində həm texniki biliklərini, həm də problem həll etmə bacarıqlarını nümayiş etdirərək müxtəlif rəqəmsal həllər üzərində çalışıblar. Ümumi mükafat fondu 10 min manat təşkil edən hakatonun Qrand Final mərhələsində layihələr peşəkar münsiflər heyəti tərəfindən qiymətləndirilib. Qiymətləndirmə zamanı təqdim olunan həllərin innovativliyi, tətbiq imkanları və ictimai faydası əsas meyarlar kimi nəzərə alınıb. Nəticələrə əsasən, “Digi Solution” komandası 5 min manat mükafat qazanaraq birinci yerə layiq görülüb. İkinci yeri 3 min manat mükafatla “ExaMinds” komandası, üçüncü yeri isə 2 min manat mükafatla “Conflict” komandası tutub. Münsiflər heyətinin qərarına görə, qalib layihələr idarəetmə proseslərinin rəqəmsallaşdırılması, vətəndaş müraciətlərinin daha effektiv idarə olunması və dövlət-vətəndaş ünsiyyətinin gücləndirilməsi istiqamətində ən perspektivli həllər təqdim edib. Təşkilatçılar bildiriblər ki, “Openwave” yalnız bir yarış deyil, eyni zamanda gənc texnologiya mütəxəssisləri ilə dövlət qurumları arasında əməkdaşlıq körpüsü rolunu oynayan platformadır. Gələcəkdə də bu istiqamətdə yeni təşəbbüslərin həyata keçirilməsi planlaşdırılır.