“Openwave” hakatonuna start verildi : 10 min manatlıq mükafat iştirakçıları gözləyir

Azərbaycanda innovasiya və açıq texnologiya ekosisteminin inkişafına yönəlmiş yeni təşəbbüs – İnnovasiya və Rəqəmsal İnkişaf Agentliyi tərəfindən təşkil olunan “Openwave” Açıq İnnovasiya Proqramı çərçivəsində hakaton keçiriləcək. Proqram çərçivəsində seçilmiş komandalar real problemlərə rəqəmsal həllər hazırlamaq üçün bir araya gələcək.

Layihənin ilk praktiki mərhələsi Nərimanov Rayon İcra Hakimiyyəti və Tedspace ilə tərəfdaşlıq əsasında həyata keçirilir. Təşəbbüsün əsas məqsədi gənc startaplar, texnologiya sahəsində çalışan mütəxəssislər və innovativ ideya sahiblərini vahid platformada toplamaqdır.

Hakaton çərçivəsində 15–20 peşəkar komandanın iştirakı nəzərdə tutulur. Komandalar proqramçılar, dizaynerlər və sahə ekspertlərindən formalaşaraq 48 saat ərzində fasiləsiz işləyəcək və müxtəlif problemlərə texnoloji həllər təqdim edəcəklər. Tədbirin sonunda münsiflər heyəti tərəfindən seçilən ilk 3 komanda ümumilikdə 10 000 AZN məbləğində mükafat fondu uğrunda yarışacaq.

“Openwave” yalnız yarış formatı ilə məhdudlaşmır. Proqramın əsas hədəfi müəyyən ərazilər üzrə problemlərin aşkarlanması, onların sistemli şəkildə uçotunun aparılması, prioritetləşdirilməsi və həll prosesinin monitorinqi üçün innovativ mexanizmlərin hazırlanmasıdır. Bu baxımdan hakaton iştirakçılar üçün həm texniki bacarıqlarını nümayiş etdirmək, həm də real ictimai problemlərin həllinə töhfə vermək imkanı yaradır.

Maraqlanan şəxslər və komandalar tədbirə qoşulmaq üçün qeydiyyatdan keçə bilərlər.