Mikro, kiçik və orta sahibkarlığa göstərilən dəstəklə bağlı yeni qaydalar təsdiqləndi
30 Jun,2026239 baxış
Azərbaycan Respublikası Nazirlər Kabinetinin 25 iyun 2026-cı il tarixli Qərarı ilə dövlət orqanları tərəfindən mikro, kiçik və orta sahibkarlıq (KOB) subyektlərinə göstərilən dəstəyin qiymətləndirilməsi qaydaları təsdiq olunub.
Yeni qaydalara əsasən, sahibkarlıq subyektlərinə təqdim edilən hər bir dəstəyin onların fəaliyyətinə, inkişaf göstəricilərinə və ümumi biznes mühitinə təsiri qiymətləndiriləcək. Məqsəd göstərilən dəstək mexanizmlərinin effektivliyini müəyyən etmək, resurslardan daha səmərəli istifadəni təmin etmək və sahibkarların real ehtiyaclarına uyğun yanaşmaların formalaşdırılmasına töhfə verməkdir.
Qiymətləndirmə prosesi vasitəsilə dövlət dəstəyi tədbirlərinin nəticələri ölçüləcək, bu tədbirlərin sahibkarlığın inkişafına nə dərəcədə təsir göstərdiyi analiz ediləcək. Bununla yanaşı, əldə olunan nəticələr gələcəkdə KOB sektoruna yönəlmiş siyasət və təşəbbüslərin daha məqsədyönlü şəkildə formalaşdırılmasına imkan yaradacaq.
Qeyd edək ki, mikro, kiçik və orta sahibkarlığın inkişafı ölkə iqtisadiyyatında dayanıqlı artımın, məşğulluğun və rəqabət qabiliyyətinin artırılmasının əsas istiqamətlərindən biri hesab olunur.
Qərarın tam mətni ilə Azərbaycan Respublikası Nazirlər Kabinetinin rəsmi internet saytının “Qərarlar” bölməsində tanış ola bilərsiniz.
