ABB İnnovasiyanın 4-cü İnkubasiya proqramının rezident startaplarından biri olan MənzilPark beynəlxalq səviyyədə mühüm uğura imza atıb.
Startap Avropa Yenidənqurma və İnkişaf Bankının (EBRD) həyata keçirdiyi Star Venture Proqramına qəbul olunub. MənzilPark bu proqram çərçivəsində inkişafını sürətləndirmək, biznes modelini daha da təkmilləşdirmək və yeni bazarlara çıxış imkanlarını genişləndirmək məqsədilə 50,000 avro həcmində strateji dəstək və investisiya əldə edib. Bu dəstək startapın həm texnoloji inkişafına, həm də əməliyyat potensialının artırılmasına töhfə verəcək.
Qeyd edək ki, EBRD-nin Star Venture Proqramı yüksək potensiala malik startapları müəyyən edərək onların qlobal bazarda rəqabət qabiliyyətini artırmağa yönəlib. Proqram çərçivəsində seçilən startaplar maliyyə dəstəyi ilə yanaşı, beynəlxalq ekspertlərdən mentorluq və inkişaf imkanları da əldə edirlər.
MənzilPark-ın bu uğuru yerli startap ekosisteminin inkişaf etdiyini və düzgün qurulmuş dəstək mexanizmlərinin innovativ ideyaların böyüməsində mühüm rol oynadığını bir daha göstərir.
Sonda MənzilPark komandasını və proqram çərçivəsində seçilmiş digər startapları təbrik edir, onlara gələcək fəaliyyətlərində uğurlar arzulayırıq.
