Data mərkəzləri Azərbaycanı regional rəqəmsal mərkəzə çevirir
Azərbaycanın data mərkəzləri sahəsindəki əsas rəqabət üstünlüyü onun regional və qlobal miqyasda əlaqələndirici rolu ilə bağlıdır. Bu fikri Dördüncü Sənaye İnqilabının Təhlili və Koordinasiya Mərkəzinin (4SİM) icraçı direktoru Fariz Cəfərov AIIF 2026 forumunun ikinci günündə səsləndirib.
Cəfərov bildirib ki, ölkədə rəqəmsal iqtisadiyyatın inkişafına dair 2026-2029-cu illəri əhatə edən strategiya hazırlanır. Sənəd 50-dən çox təşəbbüsü özündə birləşdirir və hiperscale səviyyəli texnoloji şirkətlərin Azərbaycanda data mərkəzləri qurmasını hədəfləyir.
4SİM rəhbərinin sözlərinə görə, bu mərkəzlər yalnız yerli tələbata deyil, regional və qlobal bazarlara da xidmət edəcək. Artıq bir sıra iri korporasiyalarla müvafiq müqavilələr imzalanıb.
Üstünlüklər sırasında Orta Dəhliz layihəsindəki rol, Avropaya ixrac potensialı olan yaşıl enerji istehsalı, həmçinin Çini Avropa ilə birləşdirən optik kabel xətləri göstərilib.
Eyni forumda rəqəmsal inkişaf və nəqliyyat naziri Rəşad Nəbiyev Azərbaycanın regional rəqəmsal sənaye mərkəzinə çevrilmə hədəfindən danışıb. Nazir “Azərbaycanın infrastruktur investisiya dialoqu: süni intellekt və rəqəmsal infrastruktur” adlı panel sessiyasında iştirak edib.
Panel Azərbaycan Dövlət Neft Fondu (ARDNF) və BlackRock şirkətinin birgə təşkilatçılığı ilə keçirilib. Müzakirələrdə rəqəmsal hökumət təşəbbüsləri, süni intellektin inkişafı, milli data infrastrukturu və kibertəhlükəsizlik məsələləri yer alıb.
Nəbiyev qeyd edib ki, müzakirələr zamanı ölkənin enerji potensialı, geniş optik lif şəbəkəsi və strateji coğrafi mövqeyi vurğulanıb. Nazirin sözlərinə görə, məhz bu amillər Azərbaycanı regional rəqəmsal sənaye mərkəzinə çevirmək hədəfinin əsas dayaqlarıdır.
Data mərkəzləri bazarı son illərdə süni intellekt modellərinin hesablama tələbatı hesabına sürətlə genişlənir. Bu tendensiya enerji resurslarına və tranzit marşrutlarına malik ölkələr üçün yeni investisiya imkanları yaradır.
Bakıda həmçinin superkompüter infrastrukturunun qurulması istiqamətində işlər aparılır və ölkə 2028-ci ilədək Sənaye 4.0 hazırlığı üzrə hədəflər müəyyənləşdirib.
