Baku ID 2026-da Azərbaycanın bacarıq ekosisteminin təhlili təqdim edildi
“Baku ID 2026” innovasiya festivalı çərçivəsində “SABAH.city” innovasiya şəhərciyində “Azərbaycan Bacarıqlar Akseleratoru” mövzusunda panel keçirilib. Tədbir İqtisadiyyat Nazirliyi yanında Dördüncü Sənaye İnqilabının Təhlili və Koordinasiya Mərkəzi (4SİM) tərəfindən təşkil olunub.
Panelin mövzusu Dördüncü Sənaye İnqilabı dövründə bacarıq prioritetlərinin müəyyənləşdirilməsində dövlət-özəl sektor əməkdaşlığının gücləndirilməsi olub. Həmsədrlər qismində iqtisadiyyat naziri Mikayıl Cabbarov, elm və təhsil naziri Emin Əmrullayev, SOCAR-ın prezidenti Rövşən Nəcəf və PAŞA Finance Holding-in icraçı direktoru Fərid Məmmədov çıxış edib. Moderator Dünya İqtisadi Forumunun Bacarıqlar Akseleratoru Təşəbbüsünün nümayəndəsi Alison Eaglesham olub.
Panel çərçivəsində Azərbaycanın bacarıq ekosisteminin təhlili nəticələri açıqlanıb. Təhlil əmək bazarının dinamikasını, mövcud bacarıq boşluqlarını, rəqəmsal və yaşıl keçid üçün tələb olunan kompetensiyaları, həmçinin işçi qüvvəsinin mobilliyini əhatə edib.
Nəticələrə görə, Azərbaycanda dayanıqlılıq, dəyişikliyin idarə olunması, strateji düşüncə və öyrənməyə açıqlıq istiqamətlərində güclü insan resursu bazası formalaşıb. Diqqət mərkəzində saxlanılan sahələr isə süni intellekt, data, kibertəhlükəsizlik, tətbiqi rəqəmsal bacarıqlar və yaşıl bacarıqlardır.
Alison Eaglesham innovasiya iqtisadiyyatının qurulması üçün yalnız texnoloji startapların və investisiyaların kifayət etmədiyini vurğulayıb. “Future of Jobs” hesabatına istinadən o bildirib ki, işəgötürənlərin 60 faizi bacarıq çatışmazlığını biznesin transformasiyası qarşısındakı əsas maneə hesab edir.
Fərid Məmmədov isə süni intellektə texnoloji təşəbbüsdən çox insan təşəbbüsü kimi baxmağın vacibliyini qeyd edib. Onun sözlərinə görə, məhsuldarlığın artması ilə kifayətlənib innovasiya mərhələsinə keçilmədikdə, nəticə yalnız xərclərin azalması və proseslərin sadələşdirilməsi ilə məhdudlaşır.
“Azərbaycan Bacarıqlar Akseleratoru” 2025-ci ilin noyabrında Dünya İqtisadi Forumunun Qlobal Akselerator Şəbəkəsinin bir hissəsi kimi işə salınıb. Şəbəkə 45-dən çox ölkəni əhatə edir və rəqəmsal bacarıqların inkişafı çərçivəsində təxminən 15 milyon insan ondan faydalanır.
