Bakıda tələbələr üçün beynəlxalq hakaton keçiriləcək

Bakıda innovasiya və startap ekosisteminə maraq göstərən tələbələr üçün yeni imkan yaradılır. Agentliyin dəstəyi və Estoniyanın “YellowX” şirkətinin təşkilatçılığı ilə “SAGE & IDDA University Students Hackathon” adlı 3 günlük proqram keçiriləcək.

15–17 may tarixlərini əhatə edən hakaton iştirakçılara öz ideyalarını real məhsula çevirmək imkanı təqdim edir. Proqram çərçivəsində iştirakçılar real problemlər üzərində işləyəcək, komandalar formalaşdıracaq və beynəlxalq mentorların rəhbərliyi ilə ilkin məhsullarını (MVP) hazırlayacaqlar.

Tədbirin əsas üstünlüklərindən biri də iştirakçıların beynəlxalq ekspertlərlə birbaşa işləmək imkanıdır. Kaliforniya Universitetinin mütəxəssisləri Mark Searle və Elizabeth Saunders hakaton müddətində iştirakçılara mentorluq edəcək və onların ideyalarının inkişafına dəstək göstərəcəklər.

Proqramda iştirak üçün hər hansı texniki bilik və ya proqramlaşdırma təcrübəsi tələb olunmur. Təşkilatçılar bildirir ki, əsas şərt iştirakçıların ideyaya sahib olması və innovativ düşüncə ilə prosesə qoşulmasıdır.

Hakaton Azərbaycan İnnovasiya Mərkəzində (AİM), Gənclik Plaza, Atatürk prospekti 93 ünvanında keçiriləcək.

Qeydiyyat 50 nəfərlə məhdudlaşdırılıb və müraciətlər 27 aprel tarixinədək qəbul olunur.

Qeyd edək ki, bu kimi təşəbbüslər yerli startap ekosisteminin inkişafına, gənclərin innovativ layihələrə cəlb olunmasına və beynəlxalq təcrübə qazanmasına mühüm töhfə verir.

Qeydiyyat üçün link buradadır.