Bakıda SABAH.city innovasiya şəhərciyinin ilk mərhələsi açıldı
Bakıda, Elm və Təhsil Nazirliyinin Yüksək Texnologiyalar Parkının ərazisində yerləşən “SABAH.city” innovasiya şəhərciyinin birinci mərhələsi istifadəyə verilib. Açılış mərasimində Prezident İlham Əliyev iştirak edib.
Layihə bütövlükdə 20 hektar ərazini əhatə edir. İlk mərhələ 5 hektardan çox sahədə inşa olunub və ümumi sahəsi 20 min kvadratmetrdən artıq olan 4 qarşılıqlı bağlı kompleksdən ibarətdir. Tikinti işlərinə 2025-ci ilin oktyabrında start verilmişdi.
Şəhərciyin əsas məqsədi universitetləri, texnologiya şirkətlərini və startapları eyni məkanda birləşdirməkdir. Hazırda ekosistemin 23 iştirakçısı var: 3 universitet, 8 texnologiya və innovasiya şirkəti, həmçinin 12 startap. Ərazidə 12 startap üçün kovorkinq sahəsi, 22 ofis və 13 tədris-tədqiqat laboratoriyası fəaliyyət göstərir.
Bakı Dövlət Universiteti, Azərbaycan Texniki Universiteti və Azərbaycan Dövlət Neft və Sənaye Universitetinin 1500-dən çox tələbəsi təhsilini burada davam etdirəcək. Layihə tam gücü ilə işə düşdükdən sonra şəhərciyə gündəlik 3 min nəfərin gəlişi gözlənilir.
“SABAH.city”də ASAN AI Hub və INNOLAND İnkubasiya və Akselerasiya Mərkəzi də yerləşir. INNOLAND-ın dəstək proqramlarından indiyədək 150 startap yararlanıb, onlardan dördü xarici investorlar tərəfindən satın alınıb. ASAN AI Hub çərçivəsində isə 50-yə yaxın süni intellekt həlli təqdim olunub.
İnnovasiya infrastrukturu ilə yanaşı, ərazidə 5 restoran, market, tədbir zalı, basketbol və futbol meydançaları, 2 padel kortu, piyada və velosiped zolaqları, avtodayanacaqlar və açıq istirahət zonaları nəzərdə tutulub. Layihənin növbəti mərhələləri Azərbaycanın startap ekosisteminin daha da genişlənməsinə xidmət edəcək.
