Bakıda keçirilən İİB Startap Müsabiqəsinin qalibləri açıqlandı!

Bakıda keçirilən İslam İnkişaf Bankı (İİB) Qrupunun 51-ci İllik Toplantıları çərçivəsində təşkil olunan “İslam İnkişaf Bankı Qrupunun 5-ci Startaplar və İnnovasiya Təqdimat Müsabiqəsi 2026” başa çatıb və qaliblər elan olunub.

“İİB bazarlarında innovasiya, süni intellekt, maliyyə, ticarət və sahibkarlığın gücləndirilməsi” mövzusu altında keçirilən müsabiqə üzv ölkələrdən olan startapları, sahibkarları, investorları və inkişaf tərəfdaşlarını bir platformada bir araya gətirib.

Final mərhələsi iyunun 17-də Bakı Konqres Mərkəzində baş tutub. Finala vəsiqə qazanan 12 startap beynəlxalq investorlar və ekspertlər qarşısında öz layihələrini təqdim edib. Layihələr Azərbaycan tərəfdən KOBİA və 4SİM, həmçinin İİB tərəfindən formalaşdırılmış beynəlxalq münsiflər heyəti tərəfindən qiymətləndirilib.

Tədbirdə çıxış edən rəsmilər və ekosistem nümayəndələri startapların inkişafı, innovasiya ekosisteminin gücləndirilməsi və beynəlxalq əməkdaşlığın genişləndirilməsi istiqamətində fikirlərini bölüşüblər.

İyunun 18-də keçirilən mükafatlandırma mərasimində ümumilikdə 9 qalib müəyyən olunub.

Əsas mükafatçılar:

• “BioSell” – Qızıl mükafat və 5 000 ABŞ dolları

• “Bayuti” – Gümüş mükafat və 4 000 ABŞ dolları

• “Park Hub” – Bürünc mükafat və 3 000 ABŞ dolları

Xüsusi nominasiyalar üzrə qaliblər:

• Süni intellekt və rəqəmsal innovasiya – “AIRT”

• İqlim və davamlılıq – “Proedia”

• Maliyyə inklüzivliyi – “Mink Platform”

• Qadın sahibkarlığı – “Climasel”

• Sosial təsir – “Smart Sagro”

• Regional inteqrasiya – “Interconsea (Derad Network)”

Müsabiqəyə KOBİA-nın tərəfdaşlığı ilə Azərbaycandan 220-dən çox müraciət daxil olub. Seçim prosesi nəticəsində 25 startap növbəti mərhələyə keçərək müxtəlif istiqamətlər üzrə inkişaf proqramına qoşulub.

14–16 iyun tarixlərində “Bakı KOB evi”ndə təşkil olunan üç günlük Bootcamp proqramı çərçivəsində iştirakçılar təqdimat bacarıqları, biznes modellərinin təkmilləşdirilməsi, investorlarla kommunikasiya və investisiya cəlbi mövzularında intensiv təlim və mentorluq sessiyalarında iştirak ediblər.

Müsabiqənin əsas məqsədi innovativ sahibkarlığın inkişafına dəstək olmaq, perspektivli startapların investorlarla əlaqələrini genişləndirmək, beynəlxalq bazarlara çıxış imkanlarını artırmaq və Azərbaycanın innovasiya ekosisteminin qlobal əməkdaşlıq platformalarına inteqrasiyasını gücləndirməkdir.