Cari ilin sentyabrın 25-26-da Bakıda II Azərbaycan Beynəlxalq İnvestisiya Forumu keçiriləcək. Forum beynəlxalq investorları, biznes nümayəndələrini və sahibkarları bir araya gətirəcək mühüm iqtisadi platformalardan biri olacaq.
Bunu İxracın və İnvestisiyaların Təşviqi Agentliyinin (AZPROMO) icraçı direktoru Yusif Abdullayev Bakıda keçirilən Azərbaycan–Tacikistan biznes-forumu zamanı çıxışında bildirib.
Onun sözlərinə görə, Tacikistanın biznes strukturlarının təmsilçiləri, iş adamları və fərdi sahibkarları da forumda iştirak edə bilərlər.
AZPROMO rəhbəri qeyd edib ki, agentliyin əsas fəaliyyət istiqamətlərindən biri xarici investisiyaların qeyri-neft sektoruna cəlb olunmasıdır. O bildirib ki, qurum “vahid pəncərə” prinsipi əsasında fəaliyyət göstərərək layihələrin bütün mərhələlərində investorlara tam dəstək və müşayiət xidmətləri təqdim edir.
Qeyd edək ki, II Azərbaycan Beynəlxalq İnvestisiya Forumunun ölkənin investisiya imkanlarının tanıdılması, beynəlxalq əməkdaşlığın genişləndirilməsi və qeyri-neft sektoruna marağın artırılması baxımından mühüm rol oynayacağı gözlənilir.
