Azərbaycan Texniki Universitetinin (AzTU) SABAH qruplarında təhsil alan Kənan Rzayev və İnformasiya texnologiyaları və telekommunikasiya fakültəsinin tələbəsi Fərid Mustafayevin həmtəsisçisi olduqları “Tanz Technologies” MMC-nin “ChatX” startapı mühüm uğura imza atıb. Layihə Kiçik və Orta Biznesin İnkişafı Agentliyi (KOBİA) tərəfindən təqdim olunan “Startap” şəhadətnaməsinə layiq görülüb.
Bu barədə məlumat AzTU tərəfindən “Azərbaycan müəllimi” nəşrinə verilib.
Məlumata görə, “ChatX” startapı süni intellekt texnologiyalarına əsaslanaraq müştəri xidmətlərini vahid platformada birləşdirən idarəetmə sistemi təqdim edir. Layihə şirkətlərin müxtəlif kommunikasiya kanallarını bir mərkəzdən idarə etməsinə, müştəri sorğularını daha sürətli və effektiv cavablandırmasına şərait yaradır.
“Startap” şəhadətnaməsinin əldə olunması “ChatX” üçün həm maliyyə, həm də inkişaf baxımından əhəmiyyətli üstünlüklər təqdim edir. Belə ki, startap bu statusu aldığı tarixdən etibarən 3 il müddətinə innovasiya fəaliyyətindən əldə etdiyi gəlirlər üzrə mənfəət və ya gəlir vergisindən azad olunur. Bu isə layihənin inkişafına daha çox resurs yönəltməyə imkan verir.
Qeyd edək ki, “ChatX” startapı daha əvvəl AzTU İnkubasiya Mərkəzinin “Startaplara dəstək” platformasının iştirakçısı olub. Bu platforma çərçivəsində layihə ilkin mərhələdə inkişaf üçün zəruri dəstək və mentorluq imkanları əldə edib.
Ekspertlər hesab edir ki, bu kimi təşəbbüslər ölkədə startap ekosisteminin inkişafına, gənclərin innovativ fəaliyyətə cəlb olunmasına və texnologiya yönümlü bizneslərin sayının artmasına müsbət təsir göstərir. “ChatX” kimi layihələrin uğuru isə yerli startapların beynəlxalq bazarlara çıxış potensialını da artırır.
