Azərbaycanlılar hackathonların idarəsi üçün yeni platforma hazırlayıblar

Azərbaycanda yaradılan HackathonHub platforması hackathon, oyun marafonu və innovasiya müsabiqələrinin təşkilini daha asan edir. Platforma tədbirin bütün mərhələlərini bir sistem üzərindən idarə etməyə imkan verir. HackathonHub vasitəsilə iştirakçıların qeydiyyatı, komandaların yaradılması, layihələrin təqdim edilməsi, münsiflərin qiymətləndirməsi, sertifikatların hazırlanması və yekun nəticələrin toplanması avtomatik həyata keçirilir. Bu da təşkilatçılara həm vaxt, həm də resurs baxımından qənaət etməyə kömək edir. Platformanın üstünlüklərindən biri onun təşkilatçıların öz brendlərinə uyğunlaşdırıla bilməsidir. Belə ki, istifadəçilər sistemdə öz loqo və korporativ dizaynlarından istifadə edə bilirlər. HackathonHub artıq Azərbaycanda keçirilən bir sıra texnologiya və innovasiya tədbirlərində tətbiq olunub. Platforma xüsusilə kiçik komandaların daha az insan resursu ilə böyük tədbirlər təşkil etməsini asanlaşdırır. Rəqəmsal həll kimi hazırlanan HackathonHub həm təşkilatçıların iş yükünü azaldır, həm də iştirakçılar üçün daha rahat və şəffaf təcrübə yaradır.