Azərbaycanda daha 10 layihə “Startap” şəhadətnaməsi aldı
08 Jun,20263 baxış
_1780926582.webp)
İqtisadiyyat Nazirliyinin tabeliyində fəaliyyət göstərən Kiçik və Orta Biznesin İnkişafı Agentliyinə (KOBİA) “Startap” şəhadətnaməsinin alınması məqsədilə daha 14 müraciət daxil olub. Müraciətlər “Startap” şəhadətnaməsinin verilməsi üzrə Ekspertlər Şurasının növbəti iclasında qiymətləndirilib. Qiymətləndirmə nəticəsində təqdim olunan layihələrdən 10-u müsbət rəy alaraq “Startap” şəhadətnaməsinə layiq görülüb. Bununla da Azərbaycanda bu statusu əldə edən kiçik və orta biznes subyektlərinin ümumi sayı 282-yə yüksəlib. Şəhadətnamə alan layihələr müxtəlif sahələri əhatə edir. Onların sırasında bulud əsaslı ERP platforması, rəqəmsal imtiyazlar həlli, məktəblilər üçün onlayn təhsil platforması, ağıllı bina idarəetmə sistemi, süni intellekt əsaslı müştəri kommunikasiya və satış avtomatlaşdırma platforması, qadınlar üçün rəqəmsal bələdçi, mobil ödəniş həlli, müqavilələrin elektron idarəedilməsi platforması, restoran rezervasiya sistemi və süni intellekt əsaslı rəqəmsal marketinq platforması yer alır. “Startap” şəhadətnaməsi innovativ layihələrin inkişafını dəstəkləmək məqsədilə təqdim edilir. Bu statusu əldə edən KOB subyektləri şəhadətnamənin verildiyi tarixdən etibarən innovasiya fəaliyyətindən əldə etdikləri gəlirlər üzrə 3 il müddətində mənfəət və gəlir vergisindən azad olunurlar.
