Azərbaycan Texniki Universitetinin (AzTU) tələbə və əməkdaşlarından ibarət komanda Xankəndi şəhərində keçirilən İntellektual Gənclər Festivalında uğurlu nəticə əldə edib. Festival Karabakh Training Center tərəfindən təşkil olunub və AzTU bu tədbirdə akademik tərəfdaş kimi iştirak edib.
Festival çərçivəsində keçirilən startap müsabiqəsində AzTU komandası innovativ layihə ilə çıxış edərək münsiflər heyəti tərəfindən birinci yerə layiq görülüb və layihə üçün 3000 manat məbləğində qrant əldə edib.
AzTU nümayəndələri yalnız startap müsabiqəsində deyil, digər istiqamətlər üzrə yarışlarda da aktiv iştirak ediblər. İngilis dili üzrə təşkil olunan müsabiqələrdə həm tələbələr, həm də əməkdaşlar birinciliyi qazanıblar. Fiziki yaddaş yarışında AzTU tələbəsi bütün iştirakçılar arasında fərqlənərək birinci olub. Maliyyə istiqamətində keçirilən müsabiqədə isə universitet təmsilçiləri birinci və üçüncü yerləri əldə ediblər.
Qeyd edək ki, AzTU nümayəndə heyətinin festival çərçivəsində fəaliyyəti universitetin İnkubasiya Mərkəzinin koordinatoru Azad Musayev tərəfindən koordinasiya olunub.
