Azərbaycan startapları “Microsoft for Startups Investor Network” proqramına çıxış əldə edəcək!
İnnovasiya və Rəqəmsal İnkişaf Agentliyi (İRİA) ilə Microsoft arasında əməkdaşlıq çərçivəsində Azərbaycanda fəaliyyət göstərən startaplar üçün yeni beynəlxalq inkişaf imkanları təqdim olunub.
Yeni tərəfdaşlıq əsasında İRİA, Microsoft-un “Microsoft for Startups Investor Network” proqramına qoşulub. Bu addım yerli startap ekosisteminin qlobal innovasiya mühitinə inteqrasiyasını gücləndirməyə yönəlib.
Proqram çərçivəsində startapların beynəlxalq investor və tərəfdaş şəbəkələrinə çıxışı genişlənəcək, innovativ həllərin inkişafı üçün əlavə dəstək mexanizmləri formalaşacaq. Bununla yanaşı, yerli təşəbbüslərin xarici bazarlarda tanınması və genişlənməsi üçün yeni imkanların yaradılması nəzərdə tutulur.
Əməkdaşlığın əsas məqsədlərindən biri Azərbaycanda innovasiya və texnologiya sahəsində fəaliyyət göstərən startapların qlobal miqyasda rəqabət qabiliyyətinin artırılması və onların böyümə prosesinin sürətləndirilməsidir.
