Azərbaycan startapı "UWORK" rebrendinq etdi: "Aplit.co" ilə regional bazara çıxmağa hazırlaşır

Azərbaycanın işə qəbul texnologiyaları sahəsində fəaliyyət göstərən startapı UWORK yeni mərhələyə qədəm qoyur. Şirkət bundan sonra fəaliyyətini Aplit.co adı ilə davam etdirəcək.

Rebrendinq yalnız vizual və ya ad dəyişikliyi deyil. Bu addım məhsulun inkişafı, daha geniş bazarlara çıxış və regional miqyasda böyümə strategiyasının bir hissəsi kimi təqdim olunur.

Aplit.co ənənəvi vakansiya platformalarından fərqli olaraq, iş elanlarını və namizədləri süni intellekt əsaslı uyğunlaşdırma sistemi ilə bir araya gətirir. Platforma vakansiyaları saniyələr ərzində ən uyğun namizədlərə yönləndirərək işə qəbul prosesini daha sürətli və effektiv etməyi hədəfləyir.

Yeni brend adı ilə şirkət təkcə yerli bazarda deyil, region ölkələrində də mövqeyini gücləndirməyi planlaşdırır. Bu dəyişiklik məhsulun yeni bazarlara uyğunlaşdırılması və daha geniş istifadəçi auditoriyasına çatdırılması məqsədini daşıyır.

Məlumata görə, Aplit-in qarşıdakı aylarda regional bazarda ilk addımlarını atacağı gözlənilir.