ADNSU tələbələri internet olmadan işləyən mesajlaşma sistemi hazırlayıb

Azərbaycan Dövlət Neft və Sənaye Universitetində (ADNSU) keçirilən tədbirdə tələbələr tərəfindən hazırlanan innovativ “Offline mesajlaşma sistemi” layihəsi təqdim olunub. Layihə internet bağlantısı olmadan cihazlar arasında əlaqə yaratmaq imkanı ilə diqqət çəkib.

Seminar zamanı layihənin texnoloji imkanları, işləmə prinsipi və real həyatda tətbiq perspektivləri iştirakçılara ətraflı şəkildə təqdim edilib. Layihənin müəllifləri – proqram mühəndisi Səbuhi Kazımzadə və aparat təminatı mühəndisi Mirkamil Quluzadə sistemin əsas xüsusiyyətləri barədə məlumat veriblər.

Təqdim olunan sistem uzun məsafəli rabitə texnologiyası və aşağı enerji sərfiyyatı ilə seçilən Bluetooth Low Energy (BLE) texnologiyası əsasında fəaliyyət göstərir. Bu texnologiya vasitəsilə istifadəçilər internetə qoşulmadan bir-biri ilə birbaşa mesajlaşa bilir.

Layihənin əsas üstünlüklərindən biri onun mesh şəbəkə prinsipi ilə işləməsidir. Bu yanaşmada mesajlar bir cihazdan digərinə ötürülərək daha geniş əraziyə yayılır və beləliklə rabitə imkanları artırılır. Sistem xüsusilə internetin zəif olduğu və ya tamamilə olmadığı ərazilərdə alternativ ünsiyyət vasitəsi kimi nəzərdə tutulub.

“Offline Messenger” adlı mobil tətbiq serverə ehtiyac olmadan işləyən mesajlaşma platforması kimi təqdim olunub. Tətbiq real vaxt rejimində mesajlaşma, cihazların avtomatik aşkarlanması və sadə istifadəçi interfeysi kimi funksiyalar təqdim edir. Layihə həm rahat istifadə, həm də təhlükəsiz kommunikasiya baxımından maraq doğurur.

Mütəxəssislərin fikrincə, bu cür texnologiyalar xüsusilə fövqəladə hallar, təbii fəlakətlər, internet məhdudiyyətləri və alternativ rabitə ehtiyacının yarandığı situasiyalarda böyük əhəmiyyət daşıya bilər.

Tədbir iştirakçıları tərəfindən maraqla qarşılanan layihənin gələcəkdə daha geniş tətbiq sahələrinə çıxarılması planlaşdırılır.