10 layihə Startap şəhadətnaməsi üçün seçildi

Kiçik və Orta Biznesin İnkişafı Agentliyində (KOBİA) Startap şəhadətnaməsi ilə bağlı Ekspertlər Şurasının növbəti iclası keçirilib. İclasda innovativ ideyalar dəyərləndirilib və perspektivli layihələr seçilib.
Məlumata görə, şəhadətnamə almaq üçün müraciət edən 14 sahibkarlıq subyektinin sənədlərinə baxılıb. İddiaçılar layihələrini qısa şəkildə təqdim edərək onların üstünlüklərini izah ediblər.

Nəticədə 10 layihənin Startap şəhadətnaməsi alması tövsiyə olunub. Bu şəhadətnamələr yekun qərardan sonra KOBİA tərəfindən təqdim ediləcək.

İndiyədək ümumilikdə 282 sahibkarlıq subyekti bu statusu əldə edib. Startaplar haqqında daha ətraflı məlumatı Startup Azərbaycan portalından əldə etmək mümkündür.

Qanunvericiliyə əsasən, Startap şəhadətnaməsi alan sahibkarlar 3 il müddətinə innovasiya fəaliyyətindən əldə etdikləri gəlirlərə görə mənfəət və gəlir vergisindən azad olunurlar.

Bu təşəbbüslər ölkədə startapların inkişafına və innovativ biznes mühitinin güclənməsinə dəstək verir.